Poslovne vesti - Makedonija

Владата се откажа од концесија на патарините

Владата се откажа од идејата за давање под концесија на најфреквентните патарини во земјава откако анализите покажале дека е поисплатливо државата сама да ги модернизира.

Ова следи по реакцијата на експертите кои сугерираа дека Владата сака да даде во приватни раце златна кокошка која годишно носи екстра-профит од наплата на патарините. Министерот за транспорт, Миле Јанакиески вчера најави дека патарините од Коридорот 10 ќе се модернизираат и ќе бидат целосно дигитализирани без какво и да е човечко влијание при наплатата. Планирано е модернизацијата на овие патарини и на наплатниот пункт Петровец да се реализира преку заем за што веќе е поднесена апликација за добивање финансиски средства. Според процените, дигитализацијата на патарините ќе чини околу 10 милиони евра.

- Се откажавме од концесионирање затоа што ги направивме анализите. Имавме повик за јавен интерес и видовме дека е најдобро државата сама да инвестира во делот на патарините - рече Јанакиески на вчерашната прес-конференцијата на која ги презентираше реализираните активности годинава.

Проект за гасификација, изградбата на патарини на Коридорите 10 и 8 ќе бидат приоритетни за Министерството за транспорт и врски во 2011 година. Јанакиески најави дека идната година е планирано и модернизирање на патничките возови и се преговара и со неколку меѓународни финансиски институции за обезбедување на потребните средства.

Министерот информираше дека идната година ќе продолжи и реализацијата на проектот за рехабилитација и реконструкција на регионалните и локалните патишта што се спроведува со Светска банка. 

Во однос на патната инфраструктура од Коридорот 10 почната е изградбата на патниот правец Табановце - Куманово, а се очекува тие да завршат кон средината на идната година. За патниот правец Демир Капија - Смоквица изготвен е изведбен проект кој е доставен до Европската комисија и се очекува кон почетокот на идната година тој да биде одобрен по што ќе почне постапката за избор на компанија. Годинава е изработена и физибилити студијата и идејните проекти за железничката делница Кичево- Лин, како и основниот проект за делницата Крива Паланка - Деве Баир.

Со донација од 500 илјади евра за консултант се изработува физибилити студија и процена на влијанието врз животната средина на Коридорот 10. Првите резултати се очекуваат во мај - април идната година, а целата студија треба да биде готова во октомври. По првичните резултати, како што посочи министерот Јанакиески, ќе се знае дали Европската банка за обнова и развој ќе влезе во овој проект.

Во однос на изградбата на железничката делница Битола - Кременица почната е постапка за подготовка на проектната документација, а се очекува до 2014 година таа да биде целосно завршена.